De (2) powèm Widline Pierre

I 

M dous

M dous

m reveye nan on rèv plezi 

On rèv kote n ap banbile 

Anba lapli 

M pran fremi

Lè m santi dwèt ou 

K ap kouri nan rèl do m 

K ap limen pwent tete m

Lè bouch ou koumanse eksplore kò m

Lafimen monte tout nan tounen m 

M depale, m rablabla 

M mande manje w

Kou on vwayajè k pèdi wout li 

M ta vle louvri je m 

Lanati souri 

Nan syèl la festen louvri 

Kout zeklè fè mikalaw 

Ta sanble y ap pran jòf

Sere sou ou tout kòm ap pran plezi 

M chante lavi, m ap viv

M danse bonè 

Ou mennen m nan pòt li.

II

N ap kouri 

Paske lannuit fin rive

N ap kouri

Pou n al pase swaf nou 

N al bout 

Nan vye kamyon bòs Jak la 

Nou al fini san te koumanse sou gran chimen 

San limyè 

San gid ou penetre tifi m 

Ou kite m ak on doum sik nan vwa m

Ke m pa ka vann

Lari a gen zòrèy

Nou siye zak nou 

Nou ranje tye nou 

Na al panse lakay

…

Wi-Pi Lyrics

Nòt sou otè a : 

Widline Pierre gen 21 lane, l ap viv Jakmèl. L ap etidye syans medikal.

Lekti, literati ak ekriti se pasyon l. Li penn santiman l ak sa l viv chak jou ak plim li sou on fèy kaye. Sa l wè ak sa l tande alimante inivè poyetik li. 

Wi-Pi Lyrics, se jwèt non plim li.